Gitda tarmoqlash (branching)

Baxtiyor Sulaymonov — Mon, 29 May 2023 06:33:04 +0000

Tarmoqlash (branching) gitning juda zo‘r va kerakli imkoniyatlaridan biri. Tarmoqlash yordamida loyihada yangi o‘zgarishlarni qo‘shishimiz, xatoliklarni tuzatishimiz yoki yangi g‘oyalarni sinab ko‘rishimiz mumkin va eng asosiysi bularni loyihamizdagi asosiy (main) tarmoqqa ta’sir qilmagan holda bajarolamiz.

Tarmoq (`branch`) yaratish

git branch buyrug‘i bizga mahalliy ya’ni o‘zimizni kompyuterimizda, shu loyihada nechta tarmoq yaratilgan bo‘lsa ro'yxatini ko‘rsatadi. Yonida * belgi turgani hozir ishlayotgan tarmoq hisoblanadi. Boshida odatda faqat main tarmog‘i bo‘ladi.

git branch <yangi-tarmoq-nomi>

buyrug‘i yordamida yangi tarmoq yaratolamiz. Masalan

git branch feature/hisobni-tahrirlash

degan buyruq feature/hisobni-tahrirlash nomli yangi tarmoq yaratadi.

Boshqa tarmoqqa o‘tish

Yaratganimizdan so‘ng

git checkout feature/hisobni-tahrirlash

buyrug‘i yordamida yangi yaratilgan tarmoqqa o‘tolamiz.

Tarmoqlarni birlashtirish

Yangi tarmoq yaratdik, unga o‘tib qilinishi kerak bo‘lgan ishlarni qildik, endi navbat o‘sha o‘zgarishlarni asosiyga qo‘shish. Buning uchun oldin asosiyga o‘tib

git merge feature/hisobni-tahrirlash

buyrug‘ini yozamiz. Bu buyruqni berganingizda git o‘sha tarmoqni asosiy bilan birlashtirishga urinadi, shu holatda conflict ya’ni ikkita tarmoq o‘rtasida kelishmovchilik chiqishi mumkin. Agar shunday bo‘lsa kelishmovchiliklarni to‘g‘rilaymiz keyin birlashtirish tugatiladi. Kelishmovchiliklarni to‘g‘rilash haqida nasib qilsa keyingi maqolalarda gaplashamiz.

Tarmoqni o‘chirish

Biron tarmoq kerak bo‘lmay qolsa, masalan o‘zgarishlar asosiyga qo‘shildi endi o‘zgarishlar yozilgan tarmoq bizga kerak emas. Uni o‘chirish uchun quyidagi buyruqni yozamiz

git branch -d feature/hisobni-tahrirlash

Yuqorida feature/hisobni-tahrirlash degan tarmoq nomi shunchaki misol tariqasida yozildi, siz o‘zingiz xohlagan tarmoq nomini yozasiz uni o‘rniga.

Tarmoqlarni nomlash qoidalari

Tarmoqlarni nomlaganda tartibli bo‘lgan yaxshi. Shu sababdan quyidagidek nomlash qoidalari kelib chiqqan.

feature/<yangi-imkoniyat>: Bu nomlash loyihaga yangilik ➕ qo‘shishda ishlatiladi odatda.

bugfix/<xatolik-tartib-raqami>: Bu esa nomidan ma’lum xatoliklarni 🪲 to‘g‘rilash uchun yaratilgan tarmoqlar uchun foydalaniladi.

hotfix/<yonib-turgan-xatolik-tartib-raqami>: Nomidan sezgandirsiz, loyihada tezda to‘g‘rilanishi kerak bo‘lgan yonib turgan 🔥 xatoliklar tarmoqlari shunday nomlanadi.

Bunday nomlashga majbur emasmiz lekin shu nomlash qoidalariga amal qilsak loyiha tarixini kuzatish va tushunish ancha osonlashadi. Odatda ko‘p kompaniyalarda shunday qoidalar bo‘ladi va xodim sifatida unga amal qilishimiz zarur.

Xulosa

Demak bu maqolada yangi tarmoq yaratish, unga o‘tib ishlash, o‘zgarishlarni asosiyga qo‘shish, tarmoqni o‘chirish va nomlash qoidalarini o‘rgangan bo‘ldik.

Barchasini o'zingiz sinab ko'ring. Fikr yoki savollaringiz bo'lsa izohda qoldiring.

Omad 💪

©️rasm

Ishga kirishdagi suhbat jarayoni

Baxtiyor Sulaymonov — Fri, 26 May 2023 04:53:58 +0000

Dasturchi sifatida ishga joylashish doim ham oson bo‘lmaydi. Ammo suhbat jarayoni, undagi qadamlar haqida bilsangiz, albatta foydali bo‘ladi va ko‘zlagan ishingizga kirish ehtimoli oshadi.

Jarayon umumiy quyidagicha bo‘ladi:

Ma’lumotnoma tekshiruvi (Resume screening):

Ish beruvchi sizning ma’lumotlaringizni topshirayotgan ish o‘riniga qanchalik mos ekanini tekshiradi

Telefon suhbati (Phone screening):

Ishga yollovchi (recruiter) yoki ishga qabul qilish bo‘yicha boshqaruvchi (hiring manager) bilan muloqot qobiliyatingiz, motivatsiyangiz va ish o‘rniga qanchalik mosligingizni baholashlari uchun qisqa suhbat

Texnik suhbat (Technical interview):

Bir yoki bir nechta muhandislar sizning texnik, muammolarni hal qilish va hamkorlikda ishlash qobiliyatlaringizni tekshirishadi

Xulq atvor bo‘yicha suhbat (Behavioural interview):

Boshqaruvchi (manager) yoki boshqaruvchilar jamoaviy ishlash, muloqot va yetakchilik kabi asosan yumshoq ko‘nikmalaringiz bo‘yicha suhbat qilishadi

Taklif (Offer):

Yuqoridagi qadamlardan muvaffaqiyatli o‘tsangiz, sizga o’sha ish o‘rini uchun taklif yuborishadi

PS. Bu jarayon kompaniyaga qarab biroz farqli bo’lishi mumkin, kattaroq kompaniyalarda, masalan FAANGda yana bir nechta qo’shimcha suhbatlar va tekshiruvlar bo‘ladi

manba: https://t.me/bakhtiyor_sulaymonov/175

DEV Community: Baxtiyor Sulaymonov