DEV Community: Mabrur

Nima uchun pet-loyihalar sertifikatlardan ko’ra muhimroq?

Mabrur — Fri, 25 Aug 2023 15:03:40 +0000

Bugungi kunda juda tez rivojlanib borayotgan IT-olamida yangiliklardan doimiy xabardor bo’lish juda muhim. Junior dasturchilar o’z sayohatini boshlashdan oldin ko’pincha kurslardan nima qilib bo’lsayam sertifikat olishga harakat qilishadi. Biroq, sertifikatlar siz bir kursni tugataningizni tasdiqlasa ham, ko’pincha sizni tajribangizni pet-loyihalar ko’rsatib beradi. Mana nima uchun:

Amaliy tajriba: Siz kurslar davomida teoriyalarni o’rganasiz, o’quv markazi yoki o’qituvchi tomonidan tayyorlangan loyihani birga-bir ko’chirib chiqasiz va mashqlar ishlashga vaqt sarflaysiz, pet-loyihalari esa sizdan amaliy muammolarni hal qilishni talab qiladi. Ushbu loyihalar real loyihalarga yaqin bo’lgani uchun, ishlash davomida ko’plab muaommalarga yechim topasiz va bu sizga katta tajriba ulashadi.

Qobiliyatingizni ko'rsatish: Sertifikat kursni tugatganingizni tasdiqlaydi, ammo pet-loyihalar sizni kod yozish qobiliyatingizni aniqroq qilib ko'rsatib beradi. Asosan potensial ish beruvchilar junior dasturchilarning shunday loyihalariga qarashadi.

Muammolarni bartaraf etishni o'rganish: Pet-loyihalarda biror narsa buzilib qolsa yoki rejadagidek ishlamasa, muammolarni bartaraf etish uchun faqat siz javobgarsiz. Bu holat sizga bebaho tajribalarni berishi mumkin, chunki kod yozgandan keyin xatolarni bartaraf qilish va ularni qayerdan kelayotganini aniqlash dasturchining asosiy vazifalaridan biri.

Portfolio yaratish: Raqobatdosh juniorlar ichida, pet-loyihalar asosan chiroyli rezyumelardan ko'ra balandroq baholanadi. Turli sohalardagi loyihalarga ega portoflio ishga kirish imkoniyatlarini oshirish uchun kalit bo'lishi mumkin.

Qanday qilib pet-loyihalar topish mumkin?

1. Qiziqishlaringizni aniqlang.
O'zingiz qiziqqan sohaga sho'ng'ing. Bu oʻyinlar, sogʻliqni-saqlash, moliya yoki ijtimoiy tarmoq boʻladimi farqi yo'q. Muhimi loyihangizni oʻz qiziqishlaringiz bilan uygʻunlashtirish sizga qo'shimcha motivatsiya beradi.

2. Jamiyatdagi og'riqli nuqtalarni toping.
Atrofga qarang. Sizni har kuni bezovta qiladigan narsa bormi? Ehtimol, bu vazifani avtomatlashtirish orqali soddalashtirish mumkindir.

Misol uchun, ko'plab odamlar oziq-ovqat xarid qilishda qiyinchiliklarga duch kelishadi. Uyingizda bor narsalarni unutib qo'yish odatiy hol, bu esa takroriy xaridlarga olib kelishi mumkin. Bunda oziq-ovqat uzoq vaqt qolib ketib isrof bo'lishi ham mumkin.

Yechim esa:
Shunday ilov ishlab chiqingki, u odamlarga quyidagi yo'nalishlarda yordamlashsin:

Cheklarni skanerlash: Xarid qilgandan so'ng, foydalanuvchilar o'zlarining cheklarini skanerlashlari mumkin. Keyin ilova xaridlarni virtual omborga qo'shadi.

Omborni kuzatish: Ilova omborxonada nima borligini kuzatib boradi, bu esa foydalanuvchilarga bir qarashda nima borligini ko‘rish imkonini beradi. Qo'lda kiritish yoki ma'lumotlar tahlilidan foydalangan holda, u ma'lum oziq-ovqat mahsulotlari (masalan, sut yoki non) qachon tugashini taxmin qilishi mumkin.

Aqlli xarid ro'yxatlari: Virtual omborga asoslanib, ilova xarid ro'yxatlarini taklif qiladi. Misol uchun, agar foydalanuvchi retsept tanlasa, ilova virtual omborda mavjud ingredientlarni tekshiradi va xaridlar ro'yxatiga yetishmayotgan narsalarni qo'shadi.

Yaroqlilik muddati haqida eslatmalar: Ilova mahsulotlarning yaroqlilik muddati yaqinlashganda bildirishnomalar yuboradi va bu oziq-ovqat chiqindilarini kamaytirishga yordam beradi.

Sarf-xarajatlar haqidagi ma'lumotlar: Xaridlarni kuzatish orqali ilova qancha pul sarflanayotgani haqida ma'lumot beradi, potentsial tejashni taklif qiladi yoki, agar ular yana sotib olinayotgan bo'lsa, foydalanuvchini ogohlantirishi mumkin.

Ushbu og'riqli nuqtalar bunday loyihalar uchun ajoyib asos bo'lishi mumkin.

3. Open-source (ochiq manbali) loyihalarga qatnashing.
GitHubda juda ko'p ochiq-manbali loyihalar bor. Ularga hissa qo'shish sizga qimmatli tajriba keltirishi mumkin. Shu bilan bir qatorda, siz ulardan ilhom olishingiz va shunga o'xshash dasturlarni yaratishingiz mumkin.

4. Dasturchilar hamjamiyatiga qo'shiling
Telegram, Stack Overflow, Reddit yoki maxsus kodlash forumlari g'oyalar bilan to'la. Boshqalar bilan muloqot qilish, fikr-mulohazalarni so'rash yoki mavjud dasturiy ta'minotdagi bo'shliqlarni muhokama qilish sizning uy pet-loyihangiz uchun kontseptsiyani ochib berishi mumkin.

5. Keng o'ylamang (dastlab)
Sizning birinchi loyihangiz dunyoni o'zgartiradigan ilova bo'lishi shart emas. Bu oddiy vosita, plagin yoki hatto noodatiy o'yin bo'lishi ham mumkin. Maqsad, bir joydan boshlash, o'rganish, takrorlash va keyin kengaytirishdir.

6. Tajribangizdagi kamchiliklarni aniqlang
Siz o'zlashtirmoqchi bo'lgan maxsus texnologiya yoki til bormi? Loyihangizni ushbu sohalarga e'tibor qaratish uchun moslashtirish ikki tomonlama yutuq bo'lishi mumkin: siz qurish paytida o'rganasiz va loyihangiz bitadi.

Xulosa
Esingizda bo'lsin, uy pet-loyihalarning asosiy maqsadi o'rganish va o'sishdir. Bu yerda xato qilishdan qo'rqmaslik kerak. Aynan bunday loyihadagi xatolar va qoqilishlar sizga qimmatli tajriba beradi.

Back-end dasturchi bo'lish

Mabrur — Wed, 23 Aug 2023 07:54:16 +0000

Dasturlash deganda ko’z oldimizga qorong’u xonaga kirvolib, klaviaturani shaqillatib kod yozib o’tiradigan hakker keladi, to’g’rimi? Yo'q, aslida, bu sohaga kirgan odam umrini yarmini kod yozishga emas, balki kod o’qishga sarflab yuboradi. Dasturlash juda keng soha. Undagi yo’nalishlar kundan-kunga oshib bormoqda, lekin bugun sizlar bilan backend dasturchi kim ekanligi, qanday qilib backend dasturlashni o’rganish mumkin va bu rolni egallash uchun sizdan qanday qobiliyatlar talab qilinishi haqida qisqacha gaplashamiz.

Back-end dasturchi kim?

Websitelarni mashina deb tasavvur qiling. Tashqi tomonidagi chiroyli ko’rinishi, spoyler, rangli kuzovlar va o’ziga-xos dizaynga ega bo’lgan faralar, bu frontend. Endi o’ylab ko’ring, mashinani qaysi qism yurgazib beradi? Dvigatel, yoqilg’i sistemasi va transmissiya - bu qism back-end deyiladi. Back-end dasturchilar websitelarning bizga ko’rinmas qismi bilan ishlashadi.

Ular websiteni ishlatib beruvchi “dvigatel” yaratadi va uni doimiy rivojlantirib boradi. Buning uchun dasturchilar Python, Java, PHP yoki NodeJS kabi dasturlash vositalaridan foydalanadilar. Shuningdek, backend dasturchilar foydalanuvchi ma’lumotlari kabi muhim ma’lumotlar saqlanadigan “ombor” yaratishadi, websiteni tez va qotmasdan ishlashini ta’minlashadi.

Back-end dasturchi qanday ishlaydi?

“Tezkor Sug’urta” deb nomlangan kompaniyani tasavvur qiling. Ular odamlarga uyidan chiqmasdan turib, osongiga sug'urta sotib olishga yordam berishni xohlashadi.

Kompaniya back-end dasturchi yollaydi. Endi uning vazifasi nima bo’ladi?

Ombor (ma’lumotlar bazasi) quradi: Kompaniya xodimlari o’z mijozlari haqidagi ma’lumotlar, qachon qanday turdagi sug’urta sotib olayotgani va shunga o’xshash ma’lumotlarni ko’rishi mumkin bo’lgan maxsus ma’lumotlar bazasini yaratadi.

Mijoz portalini yaratadi: Keyinchalik kompaniya uchun bir bo’lim yaratiladi. Bu yerda mijozlar tizimga login va parollari kirishlari, sug’urta ma’lumotlarini tekshirishlari va o’zgartirishlari mumkin bo’ladi. Bu shuni anglatadiki, agar mijozga ma’lumotlarini o’zgartirish kerak bo’lsa kompaniyaga qong’iroq qilib o’tirmasdan, uni o’zlari hal qila olishadi.
Ushbu vazifalarni bajarish davomida back-end dasturchi boshqa bir yo’nalish - front-end dasturchi bilan hamkorlik qiladi va u dastruchi ma’lumotlarni saytning tashqi ko’rinishida chiqib turishini ta’minlaydi. Kompaniya haqida ko’proq odam xabardor bo’laverganidan, back-end dasturchi dtmdan farqli ravishda, saytni xavfsizligi va katta oqim kelganda ham tezkorligini yo’qotmasligini ta’minlash uchun izlanishda davom etadi.

Back-end dasturchi uchun kerakli qobiliyatlar.

Texnik qobiliyatlar: Kamida bitta web dasturlash uchun kerakli tilni bilish.
Tartib: Vazifalarni va kodni tartibli olib ketish.
Ma’lumotlar bazasi: Ma’lumotlarni saqlash, qayta ishlashni o’rganish.
Hosting: Web-siteni doim online saqlaydigan joy haqida ma’lumotga ega bo’lish.
Jamoaviy ish: Front-end va jamoadagi boshqa a’zolar bilan ishlay olish.
Xavfsizlik: Web-siteni turli hujumlarga qarshi tura-olishiga ishonch hosil qilish.
API: Turli apilarni dasturga ulashni o’rganish.

Qanday qilib back-end dasturchi bo’lish mumkin?

Rolni tushunish
Eng avva Back-end dasturchilar nima ish qilishini tushunib oling. Bu turdagi dasturchilar web-ilovalarning server tomonida ishlaydi. Ular ma'lumotlar bazasini ishlab chiqadilar, web-site ishlashini ta’minlaydi va uni oddiy foydalanuvchiga tushunarli bo’lishi uchun front-end dasturchilar bilan hamkorlik qiladilar.
Ta'limdan boshlang
Universitetda Computer Science darajasi bo’lgani ma’qul, ammo majburiy emas. Bugungi kunda ko’plab dasturchilar o'z karyeralarini o'quv markazlari, onlayn kurslar, yoki o’zlari o’rganib boshlashgan.
Dasturlash tillarini o’rganing
Back-end dasturchi bo’lish uchun uchun muhim bo'lgan til o’rganib chiqing:
Ma'lumotlar bazalari haqida bilib oling
Web-ilovalar ma'lumotlarni saqlashi kerak va ma'lumotlar bazalari bunga imkon beradi. MySQL, PostgreSQL yoki MongoDB kabi mashhur tizimlar bilan tanishing va ularni o’rganing.
Frameworklar bilan tanishing
Frameworklar dastur ishlab chiqish jarayonini soddalashtiradi. Tanlagan tilingizga qarab, Django (Python), Express (JavaScript) yoki Ruby on Rails (Ruby) kabi frameworklarni o'rganing.
Veb-xostinglarnii tushunish
Veb-xosting va bulut xizmatlarining asoslarini tushuning. AWS, Heroku yoki DigitalOcean kabi platformalar qanday ishlashini bilishingiz sizga katta plyus bera oladi.
Open-source loyihalar va networking
Tarmoqlarda open-source loyihalarni qo’llab-quvvatlovchi jamoalarga qo'shiling, turli meet-uplarda qatnashing va linkedin orqali dasturchilar bilan tanishib chiqing. Networking ish topish imkoniyatlarini kengaytirib berishi mumkin.
Portfolio yaratish
Turli loyihalar quring va o’rgangan bilimlaringizni ushbu loyihalarda qo’llab chiqing. Bu har qanday dastur bo'lishi mumkin: blog, onlayn-do'kon, yetkazib berish xizmati yoki qandaydir noyob ilova g'oyasi. Ishingizni chiroyli qilib ko’rsatib berish potentsial ish beruvchilarga tajribangizni isbotlaydi.
Hech qachon o'rganishdan to'xtatmang
Texnologiya tez rivojlanmoqda. Eng so'nggi tendentsiyalar, vositalar va eng yangi texnologiyalardan xabardor bo'ling.

Aslida, back-end dasturchi bo’lish yo’lini tanlash - uzluksiz izlanishga sayohat. Doimiy harakat va qat'iyat bilan siz tez orada ushbu sohada o'z o'rningizni topa olasiz.