DEV Community: xxocoo57-alt

Оросын арми Украины тусламжийн төвийг бөмбөгдсөний улмаас 24 хүний амь үрэгдэв

xxocoo57-alt — Wed, 04 Nov 2026 04:12:37 +0000

Украины өмнөд бүсийн Запорожье мужид Оросын агаарын цохилтын улмаас дор хаяж 24 хүн амиа алдсан тухай иргэний хамгаалалтын албаныхан Даваа гарагт мэдээлжээ.

Украины ерөнхийлөгч Володимир Зеленский хүмүүнлэгийн тусламж тарааж байсан Комишуваха тосгоны сургууль уг халдлагын бай болсон бөгөөд өөр таван хүн шархадсан тухай сошиал хуудсаараа мэдээлсэн байна.

Тэрбээр энэхүү халдлагыг "Оросын зүгээс үйлдсэн туйлын аймшигтай үйлдэл" гэж тодорхойлоод тус тосгон өдрийн турш 10 гаруй удаа халдлагад өртсөнийг дурджээ.

"Эхний агаарын цохилтын дараа дахин есөн удаа бөмбөгдөж, хүмүүсийн хоргодож байсан газрыг тусгайлан онилсон" гэж Зеленский бичсэн байна.

Орон нутгийн цэргийн захиргааны тэргүүн Михайло Семикин нийт 27 хүн сураггүй алга болсон, тэднийг эрэн хайх ажиллагаа үргэлжилж байгааг Телеграм сувгаараа мэдээлжээ.

Комишувахад үлдсэн оршин суугчид долоо хоног бүр тус сургуулиас хүмүүнлэгийн тусламж авдгийг Оросын тал мэдэж байсан тул үүнийг зориудаар онилсон цохилт гэж үзэж байгаагаа Зеленский илэрхийлсэн байна.

Энэхүү халдлага нь "Орос улс мөргөлдөөнийг намжаахыг ч, бодит шударга ёсыг тогтоохыг ч хүсэхгүй байгаагийн дахин нэг нотолгоо юм” гэж тэр бичжээ.

Өнгөрсөн долоо хоногт Олешки хотод хүмүүнлэгийн санаачилгын хүрээнд гал зогсоож, оршин суугчдыг нүүлгэн шилжүүлж чадсан нь энх тайван тогтоох чиглэлд дараагийн алхмуудыг хийх боломжийг нээсэн юм.

Гэвч Оросын тал энэ жишгийг үргэлжлүүлэх хүсэлгүй байгааг энэ үйл явдал харуулсныг Зеленский мэдэгдээд олон улсын хамтын нийгэмлэгт "хүчтэй бөгөөд шийдэмгий" хариу арга хэмжээ авахыг уриалжээ.

Комишуваха нь Запорожье хотоос зүүн тийш 25 орчим километрийн зайд, фронтын шугамаас хэдэн арван километрийн зайд оршдог тосгон юм.

Запорожье муж сүүлийн хэдэн сарын турш Оросын агаарын хүчтэй цохилтуудад олон удаа өртөөд байгаа. Аравдугаар сарын дундуур Запорожье хотод болсон халдлагын улмаас дөрвөн хүүхдийг оролцуулаад нийт 23 хүн амиа алдсан юм.

Эдгээр халдлагуудад баллистик пуужин, нисгэгчгүй онгоц, залуурт бөмбөг ашиглаж байгаагаас залуурт бөмбөг гол үүрэг гүйцэтгэж байна. Оросын байлдааны онгоцнууд ийм бөмбөгийг өндрөөс, Украины агаарын довтолгооноос хамгаалах системд өртөхгүй байх аюулгүй зайнаас хаядаг бөгөөд тэдгээр нь хиймэл дагуулын залуурын тусламжтайгаар байндаа хүрдэг юм.

Эх сурвалж: Reuters

Вьетнам улс нэг хүнд ногдох дотоодын нийт бүтээгдэхүүний хэмжээгээр Индонез улсыг ардаа орхижээ

xxocoo57-alt — Wed, 04 Nov 2026 04:09:12 +0000

Олон Улсын Валютын Сангийн мэдээлснээр энэ онд Вьетнам улсын нэг хүнд ногдох эдийн засгийн гарцын хэмжээ Индонез улсынхыг давах төлөвтэй байна.

Тухайн улсын амьжиргааны түвшнийг илэрхийлдэг нэг хүнд ногдох дотоодын нийт бүтээгдэхүүний (ДНБ) хэмжээ Вьетнамд энэ жил 8.9 хувиар өсөж, $5,259 хүрэх тооцоо гарчээ.

Энэ нь арван жилийн өмнөх үзүүлэлтээс бараг хоёр дахин их бөгөөд Индонезын $5,153-ын үзүүлэлтийг давж гарч байгаа юм.

Ингэснээр Вьетнам улс Зүүн Өмнөд Азийн Улсуудын Холбооны (АСЕАН) гишүүн орнуудын дунд Сингапур, Бруней, Малайз, Тайландын дараа буюу тавдугаар байрт орох боломжтой болж байна.

Шинжээчдийн үзэж байгаагаар Вьетнамын өсөлтөд экспортын үйлдвэрлэл, электроник болон нэмүү өртөг шингэсэн бусад салбар дахь гадаадын хөрөнгө оруулалт, түүнчлэн дэд бүтцийн салбарт хийж буй томоохон хэмжээний хөрөнгө оруулалт, бүтээн байгуулалтын ажлууд гол түлхэц болжээ.

Вьетнамын засгийн газраас өнгөрсөн сард гаргасан мэдээллээр тус улсын ДНБ гуравдугаар улиралд өмнөх оны мөн үетэй харьцуулахад 9.95 хувиар өссөн байна. Энэ нь Ковид-19 цар тахал эхэлснээс хойших хамгийн өндөр улирлын өсөлт бөгөөд хоёрдугаар улирлын 8.81 хувийн өсөлтийг давсан үзүүлэлт юм.

Долдугаар сараас есдүгээр сарын хооронд экспортын өсөлт болон дэд бүтцийн хөрөнгө оруулалт нь эдийн засгийн өсөлтийг эрчимжүүлсэн бөгөөд энэ нь Вьетнамын удирдагчдын зорьж буй хоёр оронтой тоогоор хэмжигдэх өсөлтийн түвшнийг улам ойртуулсан байна.

Харьцуулбал Индонезын эдийн засгийн өсөлт 5 хувийн орчимд хэлбэлзэж байгаа юм. Гэхдээ тус улс Зүүн Өмнөд Азийн хамгийн том эдийн засаг хэвээр байгаа бөгөөд энэ онд ДНБ-ий хэмжээ нь $1.48 их наядад хүрэх төлөвтэй байна. Энэ нь Вьетнамын $542 тэрбумын ДНБ-тэй харьцуулахад хамаагүй өндөр үзүүлэлт юм.

Вьетнам улс 2030 он гэхэд нэг хүнд ногдох ДНБ-ээ ойролцоогоор $8,500-д хүргэх зорилт тавьсан нь одоогийн Тайландын түвшинтэй дүйцэхүйц үзүүлэлт ажээ.

Гэхдээ Тайландыг гүйцэхэд нэлээд хугацаа орно гэж шинжээчид үзэж байна.

Тухайлбал Дэлхийн Банкны Вьетнамыг хариуцсан эдийн засгийн ахлах зөвлөх асан Рэймонд Маллон "Хэрэв Тайландын эдийн засгийн өсөлт 2-3 хувийн орчимд, харин Вьетнамынх 8 хувьтай байвал Тайландыг гүйцэхийн тулд 2030-аад оны дунд үе хүртэл хугацаа шаардагдана. Гэхдээ ийм зүйл болох магадлал бага болов уу. Учир нь Тайландын эдийн засгийн үзүүлэлтүүд цаашид сайжрах төлөвтэй харагдаж байна" гэж хэлжээ.

Эх сурвалж: South China Morning Post

$6.3 тэрбумыг хулгайлах ажиллагаанд хакерууд ажлын ярилцлага ашигласныг илрүүлснээ Binance мэдэгдэв

xxocoo57-alt — Wed, 04 Nov 2026 04:07:21 +0000

Binance биржээс $6.3 тэрбумыг хулгайлсан хакерууд ажлын ярилцлага авах нэрийдлээр хууран мэхлэх арга ашиглаж, компанийн дотоод хиймэл оюун ухааны хэрэгсэлд нэвтэрсэн болохыг илрүүлснээ тус компани мэдээллээ.

Дэлхийн хамгийн том криптовалютын биржийг ажиллуулдаг тус компанийн мэдээлснээр хакерууд "нарийн зохион байгуулалттай, олон үе шаттай ажиллагаа"-ны дүнд системийнх нь хамгаалалтыг давж нэвтэрсэн байсан гэнэ.

Тухайлбал тэд хортой программ хангамж ашиглан Binance-ийн инженерүүдийн компьютерт нэвтэрч, улмаар биржийн хэтэвчнээс олон тэрбум ам.долларын үнэ бүхий криптовалютыг гаргаж авах боломжийг олгох хэрэгслүүдийг хяналтдаа авчээ.

Binance үүнийг "ноцтой бөгөөд маш нарийн зохион байгуулалттай халдлага" гэж нэрлээд "ийм зүйл болох ёсгүй байсан”-ыг хүлээн зөвшөөрч, уучлалт гуйсан байна.

Binance сошиал хуудсаараа мэдээлэхдээ хакерууд "нийгмийн инженерчлэл" (social engineering) буюу хүмүүсийн сэтгэл зүй, зан төлөвт тулгуурласан хууран мэхлэх аргад суурилан инженерүүдийг нь онилсон гэнэ.

Энэ төрлийн халдлагад "фишинг" (phishing) зэрэг аргууд багтдаг бөгөөд хакерууд хүмүүсийг хуурч, хувийн нууц мэдээллээ өгөхөд нь хүргэснээр тухайн хүний данс руу нэвтрэхийг оролддог.

Binance-ийн мэдээлснээр халдлагын үеэр нэгэн инженер ажлын байр хайх албан ёсны платформ дээр гарсан зарлалаар дамжуулан холбогдож, компанийн төлөөлөгч гэж өөрсдийгөө танилцуулсан хүмүүстэй хуурамч ажлын ярилцлагад оржээ.

Халдагчид түүний итгэлийг олохын тулд хувийн зураг бүхий сошиал медиа хаягуудыг хуваалцах зэрэг "илүү боловсронгуй, хууран мэхлэх шинжтэй" аргуудыг ашигласан байна.

Хоёр дахь ярилцлагын үеэр нөгөө инженерээс "даалгавар" гэх нэрийдлээр хортой программ татаж авахыг хүссэн бөгөөд уг программ нь илрүүлэхэд хэцүү болгох тусгай арга техникүүдийг ашигласан хортой кодыг агуулж байжээ.

Үүний дараа аравдугаар сард хакерууд халдлагад өртсөн инженерийн компьютер болон компанийн дотоод хиймэл оюун ухааны хэрэгслийг ашиглан өөр хоёр инженерийн зөөврийн компьютерт нэвтэрч, халдлагын дараагийн үе шатуудыг хэрэгжүүлсэн байна.

Энэ хэргийн улмаас Binance дэлхий даяарх хэрэглэгчдийнхээ хөрөнгө татан авах үйлчилгээг зогсоосон бөгөөд Ням гарагт үйлчилгээг сэргээх хүртэл хэрэглэгчид криптовалютаа биржээс татаж авах боломжгүй болжээ.

Үйлчилгээ дахин нээгдсэний дараа хэрэглэгчид олон тэрбум ам.долларын хөрөнгөө татан авсан юм.

Тус компани "Энэ явдал манай хэрэглэгчид, түншүүд болон салбарын бусад оролцогчдод санаа зовох шалтгаан, үйл ажиллагааны доголдол, тодорхойгүй байдлыг үүсгэсэнд хүлцэл өчье" гэж мэдэгдсэн байна.

Мөн уг хэргийн дараа хууль сахиулах байгууллагуудтай хамтран ажиллаж, алдагдсан хөрөнгийг мөрдөх, царцаах зэрэг хэд хэдэн арга хэмжээ авснаа Binance дурджээ.

Түүнчлэн хохирлыг нөхөхөд шаардагдах хөрөнгийг 100 хувиар тооцон нөөцөлсөн бөгөөд Бямба гарагийн байдлаар нөлөөлөлд өртсөн хөрөнгийн 98 хувийг "нөхөн бүрдүүлсэн" гэж мэдэгдсэн байна.

$6.3 тэрбумын хохирол учруулсан энэхүү халдлага нь одоогоор крипто салбарт бүртгэгдсэн хамгийн том хакерын халдлагад тооцогдож байгаа юм.

АНУ-ын Холбооны Мөрдөх Товчоо (FBI) болон Нууц алба (Secret Service) зэрэг хууль сахиулах байгууллагууд Binance платформ дээрх хэтэвчнүүдээс хулгайлагдсан крипто хөрөнгийг мөрдөн олоход туслалцаа үзүүлж байна.

Эдгээр байгууллагууд болон кибер аюулгүй байдлын шинжээчид уг халдлагад өмнө гарч байсан ижил төстэй халдлагуудын нэгэн адил Умард Солонгос зохион байгуулсан байж болзошгүй шинж тэмдгүүд агуулагдаж байгааг онцолжээ.

Мягмар гарагт Пёняны эрх баригчид энэхүү дүгнэлтийг эрс няцаасан юм.

Тус улсын өндөр албан тушаалтнуудын нэг, удирдагч Ким Жон Уны төрсөн дүү Ким Ёо Жон уг буруутгалыг АНУ-аас Умард Солонгосын нэр хүндийг гутаах гэсэн "хорон санаат оролдлого" хэмээн нэрлэжээ.

Умард Солонгосын "Lazarus Group" гэгддэг "TraderTraitor" бүлэглэлийг 2025 онд Bybit крипто биржээс $1.5 тэрбумыг хулгайлсан хэрэгт буруутгаж байсан бөгөөд энэ нь тухайн үедээ хамгийн том хохирол учруулсан халдлагад тооцогдож байв.

Binance өмнө нь Умард Солонгосыг уг халдлагад холбоотой гэж хэлэхээс зайлсхийж байсан бол Мягмар гарагийн мэдэгдэлдээ "Холбооны Мөрдөх Товчооны гаргасан хамгийн сүүлийн үеийн мэдээллээс үзвэл энэ хэрэгт БНАСАУ буруутай болох нь харагдаж байна" гэж бичжээ.

Халдлагын дараах аюулгүй байдлыг бэхжүүлэх ажлын хүрээнд Binance компани аюул заналыг илрүүлэх чадвартай хиймэл оюун ухааны хэрэгслүүдэд хөрөнгө оруулалтаа нэмэгдүүлж, мөн хөндлөнгийн кибер аюулгүй байдлын шинжээчдийг оролцуулан уг хэрэг явдалд бүрэн хэмжээний шалгалт хийлгэхээр болсноо мэдэгдсэн байна.

Түүнчлэн тус компани аюулгүй байдлын судалгааны сан байгуулж, хиймэл оюун ухаан болон аюулгүй байдлын чиглэлээр тэргүүлэгч компаниудтай хамтран тусгай санаачилгуудыг хэрэгжүүлэхээр төлөвлөж байгаагаа дурджээ.

Эх сурвалж: BBC