Sida Ugu Wanaagsan ee Qabyaaladda Looga Hortagi Karo Somaliland

Waxa qorey Maxamed Faarax Tahar Aqoonyahan ku takhasusay Maamulka iyo Siyaasadda Bulshada

Qabyaaladdu waa sun gumaata horumarka bulsho, siyaasad iyo dawladnimo. Somaliland, inkasta oo ay horumar weyn ka samaysay dhanka nabadda iyo hanaanka dawladnimo, haddana qabyaaladdu weli waa mid sal adag ku leh nolosha dadkeeda. Qabyaaladdu waxay wiiqdaa hannaanka cadaaladda, waxay curyaamisaa fursadaha dhalinyarada, waxayna abuurtaa kala fogaansho iyo kalsooni darro bulsho.

Si loo sugo mustaqbal xasiloon oo loo helo horumar waara, waa in si dhab ah oo nidaamsan loola tacaalaa qabyaaladda. Haddaba, maxay yihiin tallaabooyinka ugu waxtarka badan ee looga hortagi karo qabyaaladda Somaliland?

1. Wacyigelin Bulsho iyo Waxbarasho Tayo leh

Qabyaaladdu waa fikir, mana suurtagalayso in fikir laga takhaluso iyadoo aan la beddelin maskaxda bulshada. Waxaa lagama maarmaan ah in la hirgeliyo barnaamijyo wacyigelin ah oo lagu muujinayo khatarta qabyaaladda iyo faa’iidada midnimada. Waxbarashada dugsiyada iyo jaamacaduhu waa in ay si qoto dheer u qaataan manhajyo dhiirrigeliya isku duubnida, kartida, iyo muwaadinnimada.

1. Sharciyeyn iyo Ka-hortag Nidaamsan

Waa in la helo sharciyo si toos ah u mamnuucaya isticmaalka qabyaaladda ee shaqooyinka dawladda, siyaasadda, iyo xulashada adeegyada bulshada. Qabyaaladda waa in si sharci ah loogu arkaa caqabad hor taagan sinnaan iyo hufnaan, laguna beddelaa nidaam ku saleysan karti iyo daahfurnaan.

1. Xoojinta Aqoonsiga Qaran

Mid ka mid ah sababaha qabyaaladdu u faaftay waa hoos u dhaca dareenka muwaadinnimo. Waa in la xoojiyo Somalilandnimo oo noqota aqoonsiga ugu sarreeya ee qofku leeyahay, lagana saaro fikirka ah “qabiil baa iga horeeya”. Tani waxay u baahan tahay hal-abuur bulsheed iyo hoggaan siyaasadeed oo danta guud ka hormariya tan gaar ah.

1. Ka-qaybgalka Dhammaan Bulshada

Haweenka, dhalinyarada, culimada, iyo ururrada bulshada rayidka ah waa in si buuxda loogu dhiirrigeliyaa ka qaybgalka geeddi-socodka siyaasadeed iyo horumarineed. Tani waxay jebinaysaa xayndaabyada qabyaaladeed oo badanaa lagu dhiso cid gaar ah oo had iyo jeer ku xeeran xukunka.

1. Dhismaha Hay'ado Dastuuri ah oo Xooggan

Hay’adaha garsoorka, baarlamaanka, iyo adeegyada dawladda waa in la xoojiyo madaxbannaanidooda, lana xisaabtamaa. Meel kasta oo hay’ad dawladeed lagu hago si qabiil ku saleysan, cadaalad ma dhici karto. Qof kastaa waa in uu helaa fursad siman oo uu kaga qaybqaato nolosha dalka.

Gunaanad:

Qabyaaladdu waa cudur daweyntiisu u baahan tahay feejignaan, dadaal joogto ah, iyo hoggaan aragti fog leh. Somaliland haddii ay rabto inay noqoto dal dhisan oo dimuqraadi ah, waa in ay si buuxda ugu dhaqaaqdaa dagaal ka dhan ah qabyaaladda — dagaal ay horseed u yihiin dadka waxgaradka ah, sida ururka SAMO oo la rajaynayo inuu qayb weyn ka qaato beddelka fikradda qabyaaladeed.

Maxamed Faarax Tahar
Aqoonyahan ku takhasusay Maamulka iyo Siyaasadda Bulshada
Hargeysa, Somaliland