لو عندك متجر إلكتروني... أكيد قابلت العميل اللي بيقولك "المنتج وصلني فاضي" أو "أنا مطلبتش الأوردر ده أصلاً" أو "الشحنة اللي وصلتني مش زي اللي في الصورة".
في التجارة التقليدية، الكلام ده كان بيتحل بمناقشة وسمعة وحسن نية.
لكن أونلاين، مفيش وش في وش، ومفيش حد شافك وانت بتغلف الأوردر. فالادعاء الكاذب بقى أداة سهلة لبعض العملاء عشان ياخدوا استرداد أو منتج بدل، من غير ما يكون معاهم حق فعلي.
المشكلة الحقيقية مش إن العميل بيكدب، المشكلة إن التاجر غالبًا مش مستعد يثبت العكس.
إزاي تحمي نفسك من غير ما تدخل في نزاع كل مرة؟
صوّر لحظة التغليف بالفيديو، أو ركّب كاميرا في مكان التعبئة. دليل بصري وقت الحدث أقوى من أي كلام بعد كده.
احتفظ بإثبات الشحن ورقم التتبع، ولو المنتج غالي، اطلب من شركة الشحن توثيق فتح الطرد أمام العميل، زي ما نون وأمازون بيعملوا أحيانًا.
أي اتفاق أو تعديل مع العميل خليه مكتوب، حتى لو اتفقتوا في مكالمة، أكّده برسالة واتساب بطريقة شيك تطمّنه إن طلبه هيتنفذ.
خلي سياسة الارتجاع واضحة في صفحة المنتج والـ Check Out، واخلي التوثيق نظام ثابت لكل الطلبات مش إجراء بتعمله وقت المشكلة.
لو الموضوع بسيط ويحتمل الصح والخطأ، الأفضل تتنازل لمصلحة العميل، ده بيدخل في خدمة ما بعد البيع وبيعلي اسمك في السوق.
الخلاصة
التوثيق مش معناه إنك بتشك في عملائك. هو بيحمي التاجر الصادق من الحالات القليلة اللي بتحاول تستغل غياب الدليل، وبيخليك تحل أي نزاع بسرعة وثقة من غير ما تخسر وقتك أو فلوسك.
هل حصلتلك تجربة مع ادعاء كاذب من عميل؟ عرفت تثبت العكس ولا خسرت الأوردر؟
Top comments (0)